ନ୍ୟାସନାଲ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (NIT) ରାଉରକେଲା ଆଜି, ୧୨ ସେପ୍ଟେମ୍ବର ୨୦୨୬ ରେ, ୨୦୩୩ ଜଣ ଛାତ୍ରଛାତ୍ରୀଙ୍କ (୫୦୮ ଜଣ ଛାତ୍ରୀ ଓ ୧୫୨୫ ଜଣ ଛାତ୍ର) ସମାବର୍ତ୍ତନ ଉତ୍ସବ ପାଳନ କରିଛି। ନୀତି ଆୟୋଗର ସଦସ୍ୟ ପ୍ରଫେସର ଅଭୟ କରନ୍ଦିକର ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇଥିବାବେଳେ, NIT ୱାରଙ୍ଗଲର ନିର୍ଦ୍ଦେଶକ ପ୍ରଫେସର ବିଦ୍ୟାଧର ସୁବୁଦ୍ଧି ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ। NIT ରାଉରକେଲାର ବୋର୍ଡ ଅଫ୍ ଗଭର୍ଣ୍ଣର୍ସର ଅଧ୍ୟକ୍ଷ ଶ୍ରୀ ଏସ୍. ଏନ୍. ସୁବ୍ରମଣ୍ୟନ୍ ଉପସ୍ଥିତ ସଭାକୁ ସମ୍ବୋଧିତ କରିଥିଲେ ଏବଂ NIT ରାଉରକେଲାର ନିର୍ଦ୍ଦେଶକ ପ୍ରଫେସର କେ. ଉମାମହେଶ୍ୱର ରାଓ ନିର୍ଦ୍ଦେଶକଙ୍କ ରିପୋର୍ଟ ଉପସ୍ଥାପନ କରିଥିଲେ।
ସମାବର୍ତ୍ତନ ଉତ୍ସବରେ ଅଭିଭାଷଣ ରଖି ମୁଖ୍ୟ ଅତିଥି ପ୍ରଫେସର ଅଭୟ କରନ୍ଦିକର କହିଲେ, "ଏକ ବିକଶିତ ରାଷ୍ଟ୍ର ହେବା ଦିଗରେ ଭାରତ ଏକ ନିର୍ଣ୍ଣାୟକ ମୋଡ଼ରେ ପହଞ୍ଚିଛି ଏବଂ ଆପଣମାନେ ହିଁ ସେହି ପିଢ଼ି ଯେଉଁମାନେ ଏହି ଭବିଷ୍ୟତକୁ ଗଢ଼ିବେ। କୃତ୍ରିମ ବୁଦ୍ଧିମତ୍ତା (AI) ଏବଂ ଉଦୀୟମାନ ପ୍ରଯୁକ୍ତିବିଦ୍ୟାକୁ ଆପଣାନ୍ତୁ, କିନ୍ତୁ ବିଜ୍ଞାନ ଓ ଇଞ୍ଜିନିୟରିଂର ମୌଳିକ ତତ୍ତ୍ୱ ତଥା ଜିଜ୍ଞାସା, ସୃଜନଶୀଳତା, ସମାଲୋଚନାତ୍ମକ ଚିନ୍ତାଧାରା ଓ ନୈତିକ ବିଚାରବୋଧ ଭଳି ମାନବୀୟ ଗୁଣଗୁଡ଼ିକୁ କେବେବି ଭୁଲନ୍ତୁ ନାହିଁ। ଆପଣଙ୍କ ଜ୍ଞାନକୁ ନିଜ ସ୍ୱାର୍ଥଠାରୁ ଊର୍ଦ୍ଧ୍ୱରେ ଥିବା କୌଣସି ମହତ୍ ଉଦ୍ଦେଶ୍ୟ ପାଇଁ ବ୍ୟବହାର କରନ୍ତୁ। ନିରନ୍ତର ଶିଖୁଥାନ୍ତୁ, ଦାୟିତ୍ୱବୋଧ ସହ ନୂତନତ୍ୱ ସୃଷ୍ଟି କରନ୍ତୁ ଏବଂ ବାସ୍ତବ ମାନବୀୟ ସମସ୍ୟାର ସମାଧାନ ତଥା ସମାଜରେ ସକାରାତ୍ମକ ପରିବର୍ତ୍ତନ ଆଣିବା ପାଇଁ ନିଜ ଜ୍ଞାନର ଉପଯୋଗ କରନ୍ତୁ। ଏକ ସଫଳ କ୍ୟାରିୟର ଗୁରୁତ୍ୱପୂର୍ଣ୍ଣ, କିନ୍ତୁ ଏକ ଅର୍ଥପୂର୍ଣ୍ଣ ଜୀବନ ତା’ଠାରୁ ଅଧିକ ଗୁରୁତ୍ୱପୂର୍ଣ୍ଣ। ଏକ ନିର୍ଦ୍ଦିଷ୍ଟ ଲକ୍ଷ୍ୟ ନେଇ ଆଗକୁ ବଢ଼ନ୍ତୁ, ନମ୍ରତାର ସହ ସେବା କରନ୍ତୁ ଏବଂ ଆପଣଙ୍କ ସଫଳତା ଯେପରି ସମାଜରେ ପରିବର୍ତ୍ତନ ଆଣିପାରିବ, ତାହା ସୁନିଶ୍ଚିତ କରନ୍ତୁ।"
ଛାତ୍ରଛାତ୍ରୀମାନଙ୍କୁ ଅଭିନନ୍ଦନ ଜଣାଇ NIT ରାଉରକେଲାର ୨୪ତମ ସମାବର୍ତ୍ତନ ଉତ୍ସବର ସମ୍ମାନିତ ଅତିଥି ପ୍ରଫେସର ବିଦ୍ୟାଧର ସୁବୁଦ୍ଧି କହିଲେ, "ସୁବିଧାବାଦ ଅପେକ୍ଷା ଉତ୍କର୍ଷତା, ଅଳ୍ପ ସମୟର ସଫଳତା ଅପେକ୍ଷା ସଚ୍ଚୋଟତା, ଆତ୍ମସନ୍ତୋଷ ବା ସ୍ଥିରତା ଅପେକ୍ଷା ଆଜୀବନ ଶିକ୍ଷା, ବିଚ୍ଛିନ୍ନତା ଅପେକ୍ଷା ସହଯୋଗ ଏବଂ ପ୍ରତିଷ୍ଠା ଅପେକ୍ଷା ଲକ୍ଷ୍ୟକୁ ଗୁରୁତ୍ୱ ଦିଅନ୍ତୁ। ଆପଣଙ୍କ ପଦକ କିମ୍ବା ଡିଗ୍ରୀ ଆପଣଙ୍କ ଅତୀତର ପ୍ରଦର୍ଶନର ପରିଚୟ ଦିଏ, କିନ୍ତୁ ଭବିଷ୍ୟତରେ ଆପଣଙ୍କ ଚରିତ୍ର ହିଁ ଆପଣଙ୍କ ସଫଳତାର ପ୍ରକୃତ ମାପକାଠି ହେବ। ଆପଣଙ୍କ ସଫଳତାକୁ ଅନ୍ୟମାନଙ୍କ ଉପରେ ନିଜକୁ ଶ୍ରେଷ୍ଠ ପ୍ରମାଣିତ କରିବାର ମାଧ୍ୟମ ନୁହେଁ, ବରଂ ଏକ ଏପରି ମଞ୍ଚ ଭାବରେ ବ୍ୟବହାର କରନ୍ତୁ ଯାହା ମାଧ୍ୟମରେ ଆପଣ ଅନ୍ୟମାନଙ୍କୁ ଆଗକୁ ବଢ଼ ।
